Kıyivde Merkeziy ofitserler evinde akimiyet vekilleri arbiy esirlerniñ qorantalarınen körüştiler. Tedbir Prezident ofisiniñ yolbaşçısınıñ muavini İrına Vereşçuknıñ yolbaşçılığı altında olıp keçti.

Qorçalayıcılarnıñ tuvğanlarınıñ suallerine Arbiy esirlerge munasebet meseleleri idare ştabı, UHH yanında Arbiy esirlerni qıdıruv ve azat etüv birleşken merkezi, UYŞnıñ İnsan aqları vekâletlisi, Mudafaa nazirligi, Baş ştab, USQ, İçki işler nazirligi, Milliy malümat bürosı (MMB), ReNazirligi, halq mebusı Olga Vasilevska-Smağlük, em de Halqara Qızıl Haç Eyyetiniñ (HQHE) vekilleri ve başqaları cevap berdiler.

Körüşüvde aşağıdaki meseleler muzakere etildi:

• cenk esirlerini qaytaruv meselelerinde devlet organlarınıñ işbirligi;

• İçki işler nazirligi ve Milliy malümat bürosınıñ (MMB) cedvelleriniñ qarşılıqlı qullanuv algoritmleriniñ çalışması;

• devlet akimiyet organlarınıñ istilâcı devletniñ esirliginde bulunğan şahıslarnıñ qorantaları ile alâqaları;

• HQHEniñ işiniñ, hususan arbiy esirlerniñ tutulğan yerlerini ziyaret etüv;

• deñiştirüv içün tutulğanlarnıñ cedvellerini teşkil etüv;

• tecavuzcı devletniñ esirliginde bulunğan şahıslarnıñ qorantalarına imtiyazlar berilmesi;

• esirlikten qaytqanlarnıñ reabilitatsiyası ve ilâhre.

Subet devamında hatırlatıldı ki, ReNazirligi yanında Ukrainağa qarşı silâlı tecavuz neticesinde insanlarnıñ şahsiy azatlıqtan marum etilüvini belgilev meseleleri eyyeti çalışmağa devam ete. O, arbiy ve vatandaşlarnıñ, şu cümleden azat etilgen şahıslarnıñ esirligini tasdıqlay.

Eyyet tarafından şahsiy azatlıqtan marum etüv faktı belgilengen soñ, ReNazirligi azat etilgen şahıslarğa 100 biñ grivna miqdarında bir kerelik devlet yardımını bere.

Nazirlik, sabıq esirlerge ya da esirlikte bulunğanlarnıñ qoranta azalarına er yıl içün 100 biñ grivna miqdarında devlet yardımını bere.

Qayd etemiz ki, duşman tarafından esir alınğan şahıs aqqında malümat tek devletniñ vekâletli organlarına bildirilmeli.

Hususan, bu malümatnı 1648 nomerağa (çetelden telefonlar içün: +38 (044) 287-81-65) ReNazirliginiñ Milliy malümat bürosına yollamaq mümkün. Ya da [email protected] elektron poçtasına yazmaq, ya da MMBnıñ saytında onlayn formanı toldurmaq mümkün.